ये दिवाली टुगेदरनेसवाली !

 

!! श्री !!

नोव्हेंबर २०२०

 

“काही वेळा, इतरांशी संवाद साधून आणि कुणाचा तरी हात हातात घेऊन एका प्रवासाला सुरुवात होते. तर इतर वेळा, दुसऱ्या कुणाला तरी तुमचा हात हातात घेऊ देऊन या प्रवासाची सुरुवात होऊ शकते.”...वेरा नाझेरियन

प्रिय मित्रांनो,

वेरा नाझेरियन ही एक अमेरिकी-रशियन लेखिका आहे. ती प्रामुख्याने काल्पनिक कथा, वैज्ञानिक कथा, लोककथा व मिथकांवर आधारित गोष्टी, ज्याला मिथपंक असे म्हणतात इत्यादी लेखन करते. तिची नोरिलाना बुक्स नावाची प्रकाशन संस्थाही आहे. तिला खऱ्या अर्थाने काल्पनिक कथा लेखिकाच म्हणता येईल कारण तिचे वरील शब्द कल्पनाच वाटतात. तुम्हाला असे वाटत असेल की मी उपहासाने बोलतोय, तर आपल्या भोवताली एक नजर टाका, तुम्हाला बऱ्याच वेळा फक्त  हाव, स्वार्थीपणा, अहंकार, वाद, वंशभेद हेच आजूबाजूला  दिसेल. एकोप्याची भावना मात्र फार कमी सापडेल. अगदी एखाद्याला मदत करायची असेल तरीही ती व्यक्ती माझ्या जातीची किंवा धर्माची किंवा माझ्या समुदायाची आहे का किंवा त्याला किंवा तिला मदत केल्यानंतर मला काय फायदा होईल याचा विचार करून मगच मदत दिली जाते तसेच ती किती द्यायची हे ठरते. तुम्हाला असे वाटत असेल की यापुढचे माझे शब्द वाचायची गरज नाही कारण मी म्हणतोय हे खोटे आहे तर तुम्ही खरोखर काल्पनिक जगात राहता असे मी म्हणेन.

परंतु भोवताली किती नकारात्मकता आहे हा या पत्राचा विषय नाही तर नकारात्मकतेवर मात कशी करायची याविषयी आपण बोलणार आहोत. नकारात्मकतेवर मात करण्याचा एकच उपाय आहे ती म्हणजे एकोपा किंवा सहजीवन. एकोपा हा केवळ शब्द नाही तर ती एक भावना आहे जी तुम्हाला अशा अनेक गोष्टी करायला भाग पाडेल ज्या तुम्ही एरवी कधीच करणार नाही. एकोप्यासाठी आवश्यक असलेली सगळ्यात महत्त्वाची गोष्ट म्हणजे मनातले बोलून मोकळे व्हा. मनातले बोलल्याने जगातील बहुतेक सर्व अडचणी दूर होतात, एवढी प्रचंड ताकद त्यामध्ये आहे. तुम्हाला पटत नसेल तर हे करून बघा. तुम्ही जेव्हा निराश होता, दुःखी असता किंवा भविष्याची भीती वाटत असते, तेव्हा तुम्ही काय करता? आपण सगळेच कधीना कधी अशा मनस्थितीतून जात असतो. अशावेळी तुम्हाला फक्त कुणाचीतरी साथ हवी असते व मनातले बोलायचे असते. तुम्ही खरोखर मनातले बोलून पाहा व त्यानंतर तुम्हाला कसे वाटते ते सांगा. १०० पैकी ९९ लोकांना त्यांच्या मनातील भीती किंवा दुःख यासारख्या नकारात्मक भावना बोलून दाखवल्यावर बरे व हलके वाटले. त्यांना आपले ओझे कुणीतरी वाटून घेतले आहे असे वाटले. तुम्हीसुद्धा ज्यांच्यावर तुमच्यापेक्षा जास्त भार आहे, अशा कुणाचेतरी ओझे हलके करण्याचा प्रयत्न करा. एकोप्याच्या भावनेतून तुम्हाला व जगाला हे सहज साध्य होऊ शकेल.

ही देवाण-घेवाण केवळ नकारात्मक भावनांपुरतीच मर्यादित ठेवू नका, तुम्ही तुमच्याकडे जे काही चांगले आहे ते इतरांना देऊ शकता. मनातल्या भावना बोलल्याने जशी नकारात्मकता कमी होते तसेच काहीतरी चांगले इतरांना दिल्याने आनंद व समाधान द्विगुणित होते. गंमत म्हणजे तुम्हाला आनंद मिळवण्यासाठी व तो इतरांना देण्यासाठी पैसेच लागतात असे नाही. आयुष्यात पैसा अर्थातच महत्त्वाचा आहे, कारण तुम्ही केवळ आनंदाने पोट भरू शकत नाही, आनंद काही तुम्ही कपड्यांसारखा अंगावर घालू शकत नाही, तसेच तो तुमचे घर

 कर्जाचे मासिक  हप्तेही भरू शकत नाही, परंतु त्याचवेळी तुमच्या खिशात कितीही पैसे असले तरीही तुम्ही त्यातून आनंद विकत घेऊ शकत नाही हे देखील सत्य आहे. तुम्हाला हे संतुलन ठेवता आले पाहिजे व त्यासाठी एकोपा आवश्यक असतो. कारण तुमच्यासोबत कुणीच नसेल तर पैसा असो किंवा आनंद तुम्ही तो इतरांना दिला पाहिजे हे तुम्हाला कोण सांगेल किंवा कोणासोबत शेअर कराल हे सगळे!

मित्रांनो, आपल्याभोवती अनेक सुदैवी लोक आहेत हे मान्य आहे, मात्र आपल्याभोवती आपल्यापेक्षा अनेक दुर्दैवी लोकही आहे, म्हणूनच दिवाळीचे महत्त्व आहे, या दिवाळी ला आपल्या मनातील कुणाशीतरी बोलून नकारात्मकतेचे ओझे कमी करण्याचा प्रयत्न करा तसेच कुणाचेतरी दुःख कमी करायचा प्रयत्न करा. तुमच्याकडे जे काही चांगले आहे ते देताना हात आखडता घेऊ नका, कारण तुमच्या या देण्यामुळे कदाचित कुणाचीतरी दिवाळी उजळून निघेल, आनंदात जाईल, यालाच आपण एकोप्याची दिवाळी किंवा टुगेदरनेसवाली दिवाली म्हणू. मी म्हटल्याप्रमाणे हा अतिशय खडतर काळ आहे. आपल्यापैकी अनेकजण २०२० हे वर्ष विसरू शकणार नाहीत व त्याची कारणेही बहुतेक वाईटच असतील. या पार्श्वभूमीवर ही दिवाळी सगळ्यांनी एकत्रितपणे साजरी करून नवीन सुरूवात करणे महत्त्वाचे आहे असे मला वाटते.

आणि यासाठी तुम्ही कुणाला महागड्या भेटवस्तूच द्यायची गरज नाही, साधे  तुम्ही रस्त्यावर झाडू मारणाऱ्या महापालिकेच्या सफाई कर्मचाऱ्याला मिठाईचा डबा देऊ शकता ज्याच्या आयुष्यात दिवाळीमुळे काहीच फरक पडत नाही. तुम्ही तुमच्या सोसायटीच्या वॉचमनला पायमोजे देऊ शकता जो दिवाळीमध्येही तुमच्या घराची राखण करत असतो. तुम्ही एखाद्या स्वयंसेवी संस्थेद्वारे वनरक्षकांना स्वेटर देऊ शकता जे एखाद्या दुर्गम भागातील आपल्या गावी कुटुंबाला सोडून जंगलात दिवाळीला एकटेच असतात. तुम्ही तुमच्या समोरच्या फ्लॅटमध्ये राहणाऱ्या वृद्ध जोडप्याला हातानी बनवलेले शुभेच्छापत्र देऊ शकता ज्यांचा मुलगा परदेशात आहे व या दिवाळीला घरी येऊ शकत नाही. आणि हो, तुम्ही ज्या कुणाला भेटाल त्यांच्याकडे पाहून दिवसातून किमान एकदा स्मित हास्य नक्कीच करू शकता. चला तर मग वाट कशाची पाहताय, आपण सगळे मदतीचा हात पुढे करू आणि एकोप्याने दिवाळी साजरी करू, “ये दिवाली टुगेदरनेसवाली”!

आम्हा सगळ्यांतर्फे तुमच्या कुटुंबाला आणि मित्र परिवाराला दिवाळीच्या अनेक शुभेच्छा; एकत्र राहा, आनंदात राहा!

संजय देशपांडे आणि टीम संजीवनी

आम्ही ही एकोप्याची भावना वृद्धिंगत व्हावी यासाठी संजीवनी तर्फे नेहमीच हात पुढे करत असतो, तुम्हालाही त्यात सहभागी व्हायचे असेल तर तुमचे स्वागतच आहे, अधिक माहितीसाठी कृपया आम्हाला पुढील पत्त्यावर ईमेल पाठवा.

Email Id: smd156812@gmail.com /sales@sanjeevanideve.com / junglebelles.pune@gmail.com         

Web Site :  www.sanjeevanideve.com

Phone No: 02025434021 / 08380073013

--